Á þessari síðu verður alls konar efni tengt fjölskyldu okkar. Þegar hér stendur "við" eða "okkar" er ég að tala um mig og Guðrúnu Ágústsdóttur konu mína. Við búum eiginlega á tveimur stöðum; erum mest í Reykjavík en mikið í Reykhólasveit. Börnin okkar eru sex og barnabörnin orðin 16 og svo eru komin tvö langafabörn. Börn Guðrúnar og Kristjáns Árnasonar fyrri manns hennar eru Ragnheiður, Árni og Gunnhildur. Börn mín og Nínu, Jónínu Benediksdóttur, fyrri konu minnar, eru Svandís, Benedikt og Gestur. Tvö þeirra Benni og Gunnhildur búa með fjölskyldum sínum erlendis, Benni í Þrándheimi en Gunnhildur í Kaupmannahöfn. Og mömmur okkar Guðrúnar eru auðvitað hluti af þessari stóru stórfjölskyldu sem telur alls með öllum liðlega 30 manns. Allt þetta fólk verður einhvern tímann nefnt á þessum síðum. Þessi síða er fyrir okkur, en er samt opin en óheimilt er að nota myndir af síðunni nema það séu opinberar myndir.
 |
|
Skírn Úlfs í Neskirkju, ömmurnar til vinstri, svo Sigurður Árni,
þá Úlfur í fangi pabba síns Odds og svo mamman Sigurlaug. |
Fólk, plöntur og hestar
Hestarnir voru reknir frá Hafrafelli að Mávatúni í gær, það er 15. október. Hestarnir eru vel haldnir eftir sumarið og stefnir í að þrír komi suður um jól: Vinur, Grunur og Gráni. Bóla er vonandi fylfull. Grani er kominn á hús syðra.
Plöntuðum alls 5800 plöntum í ár. Um 5000 í vor, 800 í ágúst. Mest birki. Hætt er við að rok. þurrkar og kuldar hafi spillt fyrir plöntunum en það sést ekki almennilega fyrr en næsta vor.
Fjölmargir heimsóttu okkur í Hólasel í sumar, vinir og fjölskylda.
Fórum hringinn eins og sagt er frá annars staðar á heimasíðunum.
Skrif hafa gengið vel og útgáfa er ákveðin á næsta ári
Kalt vor við Breiðafjörð
Vorið er kalt við Breiðafjörð; vorið 2011. Við Guðrún fórum vestur 25. maí og ég með hestana daginn áður. Þrír hestar eru hér núna þau Bóla, Gráni og Grunur. Grani varð eftir fyrir sunnan og braggast vonandi í sumar í Guttormshaga. Var of þunnur í vetur en tók framförum sem reiðhestur og verður tugtaður til næsta vetur. Grunur er útskrifaður reiðhestur; kvikur og stressaður en á flestra færi samt.
Við fengum plöntur í skógræktina 27. maí. Þegar við byrjuðum að planta fyrsta morguninn var sko ekkert vor! Þriggja stiga hiti og norðanbelgingur! Héldum samt áfram; fengum él á okkur fyrsta daginn. Ríflega helmingur þess sem við setjum niður í ár er birki. Í dag þegar þetta er skrifað, 1. júní, er hitinn í fyrst sinn í tveggja stafa tölu.
Hólasel orðið miðpunktur fjölskyldunnar: Árni og Svandís voru hér með sínar fjölskyldur um páska.
Við Guðrún á leið til Vesturheims þar sem ég tala við styttu Jóns Sigurðssonar í Winnipeg 17. júní. Hlökkum til að hitta vini okkar vestra.
´
Bókarskrif á fullu.
Röskvuárið 2010
Árið er runnið í aldanna skaut. Röskva litla bættist við stórfjölskylduna 11. nóvember - þann sama dag var Valdimar afi minn fæddur að Hjarðarholti 1899. Guðrún á afmæli í dag og við stefnum á gönguferð í tilefni dagsins.Fórum á nýársnótt í hesthúsið til að athuga hvernig hestarnir hefðu það í flugeldahafinu miðju.
Árið 2011 verður vonandi gott, ár Jóns Sigurðssonar.
Gott sumar fyrir vestan
Skrifað í september; Skógræktin hófst fyrir alvöru. Plöntuðum um 3000 plöntumá norðursvæði skógræktarinnar.
Þeir Svavar Tómas og Tumi voru starfsmenn við skógræktina. Við létum girða suðursvæðið og lauk því seinni partinn í september. Þar með er komin fjárheld girðing i kringum Hólasel. Við Guðrún sóttum námskeið að Holti í Önundarfirði og ég sótti fund vestfirskra skógarbænda á Hólmavík.
Flestir krakkarnir komust í heimsókn í sumar. Meira að segja Gunnhildur með Helgu og Kristján komust vestur. Enn er Úlfur Oddsson ókominn. Hans er beðið. Verður ársgamall 8. október. Við gerum svo ráð fyrir að fjölskyldan stækki enn á þessu ári. Benni og Maja komu ekki vestur en Svavar var fulltrúi þeirra í 10 daga og Baldur stoppaði nokkra daga.
Gerum ráð fyrir að verða fyrir vestan út októbermánuð.
Þurrkar einstæðir í sumar. Heildarúrkoma ársins til þessa ekki mikið yfir 200 millimetrar.
Æðarvarp svipað og áður.
Sumarið sólríkt
3.7.2010: Sumarið er löngu komið fyrir vestan. Hvað annað?! Sólríkir og bjartir dagar, stundum strekkingur, of lítil rigning. Allt íðilgrænt. Hestarnir komu fyrstir 17. maí á þjóðhátíðardegi Norðmanna og afmælisdegi Benna afa sem svo dó seint í júní. Um hann skrifaði ég greinarkorn sem birtist á þessum síðum 7. júlí. –
Við fluttum svo vestur nokkrum dögum á eftir hestum. Svavar hefur verið nær samfellt vestra síðan, Guðrún af og til. Þá hafa niðjar og margir aðrir heimsótt okkur og notið Hólasels með okkur. Hólmarnir hafa gefið af sér svipað og áður en frjósemin virðist aðeins minni. Það sama segir Sveinn á Staðarfelli. Skógræktin er mikilvægt dagskrárefni og þar hafa þeir Svavar Tómas og Tumi stigið geyspurnar með okkur og flekkjað grimmilega með vinstri fætinum. Tumi gerði stutta heimildamynd um verkið. – Byggingaframkvæmdir ganga samkvæmt áætlun undir forystu Ármanns. – Girðingu meðfram þjóðvegi lokið á parti en framundan eru meiri girðingar. – Of lítill tími hefur gefist til skrifta. - Loks: Sá barnvæni 14 vetra hestur sem fyrr var getið í vorpistli heitir því frumlega nafni Gráni.
Vorið er komið
Vorið er komið og við erum á leið vestur. Það er svalt enn á suðurhluta Vestfjarða en samt er komið vor. Það er greinilegt. Það er komin nál í hagann. Hestarnir hafa verið inni frá byrjun febrúar í Gusti og hafa verið talsvert notaðir; Bylur og Grunur brúklegir báðir og Bóla hress þrátt fyrir háan aldur. Í hópinn er svo kominn hvítur 14 vetra barnvænn klár. Eftir að gefa honum almennilegt nafn. – Við förum svo á skógræktarnámskeið af því að við ætlum að fara að planta. Það hafa aldrei vaxið tré á þessum slóðum en við leggjum af stað, bjartsýn. Fuglinn í þann veginn að leggjast upp og ernir fljúga yfir ógnarlega stórir miðað við allt umhverfið. En smyrillinn kjarkmestur allra fugla óttast ekki stóru skepnurnar; ekki einu sinni manninn. Gerum ráð fyrir að sjá krakkana hjá okkur vestra í sumar. Það er bjart við Breiðafjörð; á góðum degi sést Snæfellsjökull úr innsveitinni. Framundan er búskaparstúss, landsmót og í ágúst er stefnt á að skoða Ísland aðeins betur.
(Skrifað um miðjan maí.)
Sólarpáskar
Skrifað 6. apríl: Þetta voru sólarpáskar í ár. Sólskin upp á dag og til dæmis þrjár fermingarveislur: Tumi fermdur og þar voru margir saman komir úr fjölskyldunni. Sama dag varð móðir mín 86 ára, Dúna; sú ætlar að sækja á öldina, samt ekki beint alin upp með silfurskeið í munni. Svo ferming hjá Fríðu systur minni og Pétri manni hennar þar sem Ingibjörg Hrefna dóttir þeirra fermdist og nafna hennar frá Blönduósi kom alla leiðina suður til að vera með á hátíðastundu. Veislan fór fram í Grafarvogskirkju sem er listaverk eins og við mátti búast af arkitektunum. Og á undan Tuma var Palli fermdur; hann er sonur Önnu Stínu, barnabarn Sveins bróður míns og Þóru og hefur ákveðið að verða atvinnumaður í knattspyrnu. Hann er vís til að standa við það. Hann er í Stjörnunni. Á föstudeginum buðum við Guðrún ættboganum okkar til síðdegissamkomu; þau eru alls liðlega 30 – yfir tvo tugi mætti: Svandís og Torfi, Auður,Tumi og Una. Benni og Maja, Rabbi, Svavar og Baldur, Ragnheiður og Svavar, Guðrún og Hrefna, Árni og Anna María, María Kristín og Áshildur, Gestur með Svavar Tómas, Bergþóru og Nínu. Og svo ömmurnar; amma Agga og amma Dúna. Vantaði samt 9 að þessu sinni; Dóra að lesa til prófs, Gunnhildur og Siggi og Helga og Kristján í Danmörku og Úlfur með pabba sínum og mömmu, Oddi og Sigurlaugu, fyrir norðan, Arnaldur á Fimmvörðuhálsi.
Daginn eftir erum við í afmælisveislu hjá Bergþóru Sóleyju sem er orðinn 11 ára. Nú eigum við þrjú sem eru 11 ára! Geri aðrir betur.
Að kvöldi páskadags erum við Guðrún hjá Ragnheiði og Svavari Hrafni með ömmu Öggu.
Benni og Maja komu frá Þrándheimi með strákana sína um páskana. Og við feðgar, ég Benni og Gestur, URÐUM auðvitað að nota tímann til að að fara á hestbak og í langa reiðtúra. Hestarnir skiluðu sér allir vel; Bóla eins og unglamb enda bara tvítug. Grunur verður notalegur töltari og þægilega viljugur, er aðeins sjónhræddur og þolir ekki hunda. Sá stóri Bylur, nokkuð þungur með skemmtilegt töltpor á hægu en kann enn best við skeiðtaktinn. En þægur og traustur.
Og Svavar fékk að fara með okkur og prófaði hvítan hest Peters; hestur sem heitir Huginn og er eins og hugur manns.
Semsé sólarpáskar
Hestarnir
Skrifað 6. mars: Ég er kominn með þrjá hesta á hús. Það eru Bóla mín ættmóðirin sem er orðin 20 vetra en lífleg eins og tryppi. Svo er það Grunur sonur hennar, rauðglófextur undan Rökkva frá Hárlaugsstöðum. Bóla er komin af Höfða-Gusti í föðurættina og sýnir létta takta þaðan en það gerir sonurinn Grunur líka. Þriðji hesturinn á járnum er Bylur 7 vetra frá Vorsabæ. Stór og stæðilegur klár og efni í fjölskylduhest, það er hest fyrir óvana. Ég hef ekki komist á hestbak eins og ég hefði viljað – var skorinn í hné en er allur að braggast og þá verður tekið á þessum ferfætlingum . Ég var svo heppinn að komast aftur í gömlu Gustshúsin þar sem við vorum með hesthús fyrir 20 árum.